يا عراقيون لاتضوجون مني ...

 

جيبوا ليل واخذوا عتابة

 

 

نوري جاسم المياحي

 

 

والله مسكين شعبنا العراقي ما يستاهل اللي جا يصير بيه ويسويه الما يخافون الله ...صار شهور ودوخونا وكالت الانتخابات وحجت الانتخابات والبارحة راح الشعب للانتخابات افواجا افوجا ...والسبب بسيط كما تعلمون لاحبا بزيد او عبيد وانما يحلمون بتغيير الوجوه القبيحة التي سكنت شاشات الفضائيات وهرت اسماعنا بالكذب والتصمبع والوعود الرنانة والبطولات الطنانة ...راحت الناس على امل التغيير .. وبصمت باللون الازرق وخرجت بقناعة  ان جهاز البصمة هم بيه لولة وبيه ريحة جايفة مثل جهاز السونار لكشف المتفجرات السيء الصيتوهكذا طارت  128 مليون دولار وراحت بالشط وراح نرجع للفرز اليدوي ....في مطار بغداد الدولي

وهنا اكللكم اوكفوا لا تستعجلوا على رزقكم ...ترة المصيبة توهه بدت وجيبوا ليل واخذوا عتابة .. اي كدامكم ليل طويل وبيكم خير ودكوا ربابة وغنوا عتابة ..الى ان تكرهوا العتابة واللي غناها اول مرة ...

اني ما اريد اضوجكم من احجي وياكم بصراحة ... لان هواية ناس صرفت المليارات وتريد تحصل نتيجة والنتيجة ببطن خديجة ... ولمن تطلع راح تطلع رواح الميتين والطيبين ..

وكونوا على ثقة ان الحكومة لانها راح تتحول حكومة تصريف اعمال بلا رقيب ولا حسيب يعاكسها ومو مستعجلة على ترك كراسي الحكم وكذلك امريكا ما يهمها ان قتل يوميا 50  او 100 عراقي سواء اكانوا محسوبين على هاي الجهة او تلك ...بس المهم عندها لاتفلت الامور من ايديها ... ولا تشتعل الحرب الاهلية بين العراقيين ولاتدخل بحرب ومواجهة مع الايرانين ولا ان تصل (داعش) الى المنطقة الخضراء ... اما ايران ايضا فهي لايهمها من يحكم العراق زيد او عمر ..المهم مصالحها ومنطقة نفوذها مؤمنة وكورقة رابحة تستخدمها كما تشاء ..وكذلك الاتراك والسعوديين والخليجيين ...المهم ابقاء العراق ضعيفا ممزقا وميدان للصراع الطائفي ولايهمهم ان مات نصف الشعب العراقي .. وهكذا دواليك ..الكل لايهمهم الانتخابات ونتائجها وانما المهم عندهم توضيب الطبخة بحيث ياكلها الجميع والكل راضي وفرحان بانه خرج من الانتخابات منتصر ... لان الكل ستنتظر بفارغ صبر اعلان النتائج وتشكيل الحكومة العتيدة ...وعلى استعداد تام لتقديم التنازلات  اي بكلمات مختصرة ومفيدة ان المالكي ووزارته وكما تعلمون هي ( وزارة محاصصة ومشاركة وطنية وكل الكتل مشاركين فيها ) ستبقى وزارة تصريف اعمال وبلا مجلس نواب يتنحنح او يعتب ..ورئيس جمهورية غائب عن الساحة ...وهكذا سيبقى المالكي وحبايبه اللاعب الوحيد بالساحة وجيب ليل واخذ عتابة ...وهزي يا وز ..يابعد روحي .

اتدورون يا اخواني ...لم تمر ساعات على غلق صناديق الاقتراع ... واعلن انصار الحكيم عن فوزهم الساحق .. وانبرى الصدريون لاطلاق التهديدات بالويل والثبور للمفوضية في حال تلاعبها بالنتائج ... وحتى النجيفي وضع خط رجعة اله ولجماعته عندما قال ان الطعن بتزوير الانتخابات سابق لاوانه ..فالكل ستنتظر وتراقب وتناضل وتحاور وتتنازل من اجل الحصول على عضة دسمة من الكيكة ..

وهنا سيبدأ سيناريوا المطبلون والزفافة والابواق الناعقة بالدق على الدفوف بوتيرة واحدة تعود عليها العراقيون منذ السقوط والاحتلال وحتى يومنا هذا ...ازمة تعقبها ازمة وبين ازمة مفتعلة توجد ازمة وهكذا تستمر دوامة الازمات والشعب مثل الاطرش بالزفة وهكذا ستبدا التسريبات والتصريحات وتعقبها التبريرات وفي الاخر التهديدات والمسبات وفي خاتمة المطاف ..بتلفون واحد من واشنطن تحل كل الاشكالات ويتفقون على التسويات ... لك الله يا عراق .... فلا تنسوا ان الدرب امام تشكيل وزارة جديدة سنة او سنتان .. ومزيد من الفوضى والفلتان ...والعطش والفيضان ..والله هو المستعان ..

تذكروا ان المالكي فائز والنجيفي فائز وعلاوي فائز والمطلك فائز والحكيم فائز ومقتدى فائز ... وامريكا فائز وبريطانيا فائز واسرائيل فائز واكيد ايران وتركيا والسعودية ايضا فائزون ...واتدرون من الخاسر بالعملية كلها ...هو المواطن العراقي البسيط والفقيرالمسكين  وكذلك  يمكن اعتبار المرجع الديني المسكين البشير النجفي ايضا من الخاسرين  لانه تورط ووقف وقفة شجاعة مع الشعب المظلوم ضد الفئة الباغية بحرمة انتخاب المسؤول الفاشل والفاسد والحرامي ... وهنا اعلن المتضررون من الفتوى الحرب الشعواء ضد الرجل وكانه كفر وخرج عن الطاعة ... وربما غدا سيتهموه بتزوير لقب المرجعية او انتحاله  ... ولله في خلقه من بعض العراقيين شؤون ... فكل شيء عندهم ممكن ..

اخوتي ... لاتضوجون مني جيف اكللكم على كيفكم ولا تستعجلون ولا تحلمون احلام سرمدية ..فالتغيير اكيد قادم ولكنه يطبخ على نار هادئة تستغرق سنتين وربما اكثر وعلى الطريقة الايرانية ..او ربما التغيير يحصل بسبب اعصار يهب من المنطقة الغربية ويضرب سكنة المنطقة الخضراوية ...والله اعلم بما تخططه الادارة الامريكية والبريطانية ..

اللهم احفظ العراق واهله اينما حلوا او ارتحلوا ..  

 

 

 

تنويه / صوت اليسار العراقي لا يتحمل بالضرورة مسؤوليّة جميع المواد المنشورة .. ويتحمل الكُتّاب كامل المسؤولية القانونية والأخلاقية عن كتاباتهم

الصفحة الرئيسية | [2]  [3] [4] | أرشيف المقالات | دراسات | عمال ونقابات | فنون وآداب | كاريكاتير  | المرأة | الأطفال | حضارة بلاد الرافدين | إتصل بنا