قيم الرگاع من ديرة عفچ

 

شعر / ملا عبود الكرخي

قيّم الرگاع من هاي اللحى
تشوفه هيبة وعنده لحية مسرّحه
يشتم بلا خجل ولا مستحه
من يحس المقعد شويّه اندحچ
قيم الرگاع من ديرة عفچ

برلمان اهل المحابس والمدس
عگب ماچانوا يدورون الفلس
هسه هم يرتشي وهم يختلس
ولو نقص من راتبه فلس انعقچ
قيم الرگاع من ديرة عفچ

اتشوف واحدهم معمّم بالوقار
وبالاصل تاريخه أسود كله عار
بضرف ثلث اسنين مليونير صار
يريد عالوادم يعبّرله چلچ
قيم الرگاع من ديرة عفچ

گمت ما اعرف حماها امن الرجل
ياهو التكضه اهو ايمثل العدل
وگمنه نستورد الشلغم والفجل
لان كلها ضلت اتدور ودچ
قيم الرگاع من ديرة عفچ

والله ضيعنا الصدگ من الچذب
تشوفه هيبه وحچيه المصفط عذب
ياخذك ويردك بشرق وغرب
وبسچاچينه يدچك حيل دچ
قيم الرگاع من ديرة عفچ

حيل دوخني الحچي الماله ربط
وصار عندي سكر وحصبه وضغط
نفترش عاگول ونتغطه بحسچ
قيم الرگاع من ديرة عفچ

گمت ما اميز الذيب من الحمل
منين ما التفت گلبي يشتعل
آنه ما شايف شعب يتبع خبل
شاب راسي وتيهت كل السچچ
قيم الرگاع من ديرة عفچ

يا حكومتنه الرشيده ام الوقار
الفساد المالي عنوان الچ صار
ندري جابوكم بدبابه وقطار
ليش ضليتوا سمچ ياكل سمچ؟
قيم الرگاع من ديرة عفچ

لازم انميز الزين من الزلم
وننتخب كلمن شهم صاحب علم
ونرفض اللي يجي كل يوم بفلم
من يشوف المنصب شويه اندرچ
قيم الرگاع من ديرة عفچ

 

 

تنويه / صوت اليسار العراقي لا يتحمل بالضرورة مسؤوليّة جميع المواد المنشورة .. ويتحمل الكُتّاب كامل المسؤولية القانونية والأخلاقية عن كتاباتهم

الصفحة الرئيسية | [2]  [3] [4] | أرشيف المقالات | دراسات | عمال ونقابات | فنون وآداب | كاريكاتير  | المرأة | الأطفال | حضارة بلاد الرافدين | إتصل بنا