" اشويه من الديمقراطية "

شعر شعبي / هاشم صياح الحجامي

من صدام البوش وربعه   ***  ونفس الحسره ونفس الدمعه

عالچوله أنركب مرگتنه   ***  وبالليل انسولف عالشمعـــه

ظلت نفس الحسره البينه  ***  وظلينه احنه بنفس اللوعــــه

عطشانين أندور مـــــاي   ***  وماي البير شلون نجرعـــه

ظلمة البيت وظلمة الشارع*** فنه اليگدر راسه يطلــــعه

امسلبچيه ابكثر  الدود     ***  اتنزعه اهدومه وراسه تگطعه

چان الخوف اعلينه امخيم   ***  هسه الخوف تضاعف سبعه

چنه انخاف من الزيتوني  ***ونشرد منه الارض الوسعه

هسه الكل اتخوف گامت   ***  وين اتروح تجيلك صگعه

گالو وله اصدام وگلنه    ***ودفعت مردي وما مش رجعه

وگالوا خير وگلنه انشالله  ***  وخل نشوف الجانه شنفعه

وبالمشمش طلعت يا وسفه ***  كل ما گالوا :مال الوجعه

صار أشهور التايت ماكو  ***  والصابون اتاخر فجعه  -------( فجاة )

بس الفرهد ياكل خبزه     ***   وبس الزور حصل رفعه

واحد صار استاد وعين    ***  كل طايفته وحشد جمعه

او واحد ظل مچبوب ابيته  ***  يصيح الغوث ومنهو ايسمعه

واحد وصلت بطنه الخشمه  ***  او واحد مامش لگمه تشبعه

او واحد يكدس دولارات   ***  او واحد بس ايلگ ابصبعه

او واحد دش اثلث اقمار ***ويگضي الليل ايدور متعه

او واحد مامش گطرة نفطه  ***  ايحط بالصوبه ايدفي الضلعه

او واحد  يلبس موديلات  ***  وقاط يلبسه ...وقاط اينزعه

او واحد حاير ثوبه تشگگ   ***  ومامش وصله بلونه يرگعه

او واحد يركض بلچن شغله ***أتعيش أطفاله وهو اتنفعه

وذاك أيجره وهذا أيسطره   ***  وذاك يشتمه وهذا أيدفعه

او وين الشغله وكله انلزمت  ***  كلمن حزبه وكلمن ربعه

چاوين اوعودك (ياشسمك)  ***چنه اوعودك طلعت بدعه

چا لاتزعل مني من احچي  ***  ملسوع إني أبميت لسعه

خليني اصرخ ...

من صدام البوش وربعه   ***  ونفس الحسره ونفس الدمعه

نفس الدمعه

تنويه / صوت اليسار العراقي لا يتحمل بالضرورة مسؤوليّة جميع المواد المنشورة .. ويتحمل الكُتّاب كامل المسؤولية القانونية والأخلاقية عن كتاباتهم

الصفحة الرئيسية | [2]  [3] [4] | أرشيف المقالات | دراسات | عمال ونقابات | فنون وآداب | كاريكاتير  | المرأة | الأطفال | حضارة بلاد الرافدين | إتصل بنا