فى ذكرى الثورة

 

 

شعر /  احمد عبد الحكم دياب

 

 

الثورة زى أدان وترنيمة وحنين

تغيير ووعى ومسح دمعاية وأنين

ووردة بلدى حلوة مش دبلانة

اخلاق نبيلة

ومثل عليا 

ويسار ويمين

والشعب صانع ثورته

كاتب تاريخه وقصته 

الشعب كل الشعب واقف وقفته

الشعب بشبابه الجميل صمم

وف قلب اسفار التاريخ علم

ورفع شعاراته واتهز واتكلم

الشعب ثاير والميادين ثائرة

الشعب زاحف بالقلم والمسطرة

لكن فى عز الضلمة 

من غيط الذرة

ظهر اللى كان لابد ومتخفى ورا

واتسرقت الثورة

ولا عيش ولا حرية

ولا عدل ولا انسانية

واتبعزق الثوار

 

***

ليه يا بلد بيكفروا ولادك

والمستفيد كان اجنبى ببرنيطة

ابنك يا مصر بيجلدوه حسادك

وابو حطة وعقال بيبنى مقبرة وحيطة

وينهبوا زرعك وجنى حصادك

ويشوهوا دينا العظيم بالزيطة

ليه الفنار طفوه وجففوا فى النهر

ليه الحصان كتفوه ومعذبين المُهر

ليه يا بلد رجعت سنين القهر

تربط ايدينا وننجلد ع الضهر

ليه يا وطن بيموت شبابك جوع

ويموت مريضك منحنى وموجوع

ودوا عليلك انكسار ودموع

ليه الوطن ساب الميزان يختل

وساب الميدان ينطفى وينشل

وداير يدور ع الخلاص والحل 

بعد خراب مالطا

وشرب الخل

***

 

ليه يا وطن على دفتك مجاذيب

بدقون طويلة وملفحة وجلاليب

ليه يا وطن بيكدبوا ع الناس

بجهل واضح فى السياسة وعيب

والاقتصاد مش علم أو تخطيط

دا رزق مقسوم ومتقدر فى علم الغيب

دينهم يقول ان الحريم للبيت

غنايم جميلة منورة ووالعة

وحلال عليهم أى ست طالعة

ما هى سبية 

أو هدية

أو صبية خالعة

بيحرموا حتى الغنا ع العود

ويحطموا التماثيل لَبُكرة تعود

اصنام واوثان واحنا بجهل سجود

متصورين ان الهرم معبود

مش شئ حضارى أوتراث مشهود

***

 

ويكفرونا بأفكار قديمة مكسحة

ويخزنوا فى تلال من الأسلحة

ويفجرو لنا الجوامع 

ويهدموا الأضرحة

وينشروا الجهل ورايتهم سود

آه يا بلد بيغمموكى بجهل

ويعَقّدوا دينّا اللى أصله سهل

ويكفروا ولادك ويقتلوا فى الأهل

***

 

الدين معاملة زى ما قال الرسول

والمسلمين بنيان قوى ومعدول

والمسلم اللى يصون لسانه وايده

ويآمن الناس من أذاه وتهديده

ويحبوا بعض حبهم لنفوسهم

وما يخافوا الا من  الإله ووعيده

الدين أساسه الإيمان بالله

واخلاق حميدة ترتبط وياه

وعدل اجتماعى ييجى بالمساواة

دا هوا دينّا وهوا دا معناه

***

 

يا مصر دا انتى اللى اخترعتى الدين

والهمت اخناتون للتوحيد

وموسى فى ارضك واجه الفراعين

ويوسف الصديق بأمر الله

بقى على خزن الأراضى أمين

وسيدنا ابراهيم خد هاجر المصرية

أم العرب وأم النبى سماعين

وعيسى ابن مريم والحواريين

دخلوا ببانك من الناحية الشرقية

وسيدنا النبى زوج مارية القبطية

سيدنا النبى سيد ولاد العرب

قال ان مصر اهل ذمة ونسب

***

 

يا مصر اسلامك ونورك يبهر

بيشع م الفسطاط 

وجامع الازهر

يا مصر امتى الثورة راح ترجع

بوعى مش خرافات كتاب أصفر

قومى يا مصر نفضى غبارك

وضمى شهيدك واحضنى ثوارك

وحررى عقول الولاد وديارك

ورجعى الثورة نشيد اخبارك

 

القاهرة ٢١ يناير ٢٠١٣

 

 

 

 

 

 

تنويه / صوت اليسار العراقي لا يتحمل بالضرورة مسؤوليّة جميع المواد المنشورة .. ويتحمل الكُتّاب كامل المسؤولية القانونية والأخلاقية عن كتاباتهم

الصفحة الرئيسية | [2]  [3] [4] | أرشيف المقالات | دراسات | عمال ونقابات | فنون وآداب | كاريكاتير  | المرأة | الأطفال | حضارة بلاد الرافدين | إتصل بنا